Фәйзи Ғәскәров исемендәге академия халыҡ бейеүҙәр ансамбле яңы бейеү өҫтөндә эш алып бара. Коллективтың матбуғат хеҙмәте хәбәр итеүенсә, Октябрь революцияһының 100 йыллығына бағышлап ҡуйыласаҡ бейеү - “Комбриг Мортазин” тип атала. Бейеү ҡуйыусы -  Башҡортостан Республикаһының атҡаҙанған мәҙәниәт хеҙмәткәре , Ш. Бабич исемендәге дәүләт премияһы лауреаты, билдәле бейеүсе Рәис Низаметдинов.

  Муса Мортазин – башҡорт халҡына автономия алып биреүгә күп көс һалған дәүләт эшмәкәре. Башҡорт халҡының бөйөк улы, Граждандар һуғышы ҡаһарманы, полководец  Муса Лотфулла улы Мортазинға бағышланып ижад ителгән был бейеү тиҙҙән тамашасы хөкөмөнә сығарыласаҡ һәм репертуарҙағы башҡа бейеүҙәрҙән ҡырҡа айырылып торасаҡ.

Әлеге ваҡытта бейеү өҫтөндә ҡыҙыу эш алып барыла, рәссамдар, музей хеҙмәткәрҙәре, костюмерҙар ҡуйылыш эшенә йәлеп ителгән.

Башҡорт халҡының милли батыры, дәүләт эшмәкәре Муса Лотфулла улы Мортазин Учалы районы Көсөк ауылында күп балалы ярлы крәҫтиән ғаиләһендә тыуған. Башланғыс белемде, ярлылыҡтан уҡыу өсөн түләй алмау сәбәпле, бик ҙур ҡыйынлыҡтар менән Байрамғол мәҙрәсәһендә ала.

Муса Мортазин  кесе йәшенән үк  тышҡы ҡиәфәте менән башҡа тиңдәштәренән ҡырҡа айырылып торған. Алпамышалай буй-һын, көрәшселәргә генә хас булған киң күкрәк, мускуллы беләктәр; етеҙ, ышаныслы ҡыйыу хәрәкәт һәм ғәйрәтле ҡара-һоронҡо йөҙө, киң маңлайы, аҡыллы ҡоңғорт күҙҙәре, ҡуйы ҡара шырт мыйыҡтары тәү күргән бөтә кешене лә үҙенә тиҙ йәлеп иткән.

Мыҡты кәүҙәле, сысҡан һыртлы Ирәмәл исемле ярһыу, ҡара аты яу ҡырында Муса Мортазиндың иң ышаныслы хәрби яуҙашы, ярҙамсыһы булған.

Гүзәл Багаева