Өфө “Нур” татар дәүләт театры Әнғәм Атнабаевтың “Ул ҡайтты” драмаһы өҫтөндә эш башланы. Әҫәрҙе сәхнәгә ҡуйыу өсөн билдәле режиссер Азат Йыһаншин саҡырылған. Тамашасыларға премьера Еңеү байрамы алдынан күрһәтеләсәк.

Ҡуйыусы режиссер – Башҡортостандың атҡаҙанған артисы Азат Йыһаншин, ҡуйысы рәссам – Юлиә Ғиләжева, композитор –Ш.Бабич исемендәге Йәштәр дәүләт премияһы лауреаты Юлай Үҙәнбаев, хореограф Башҡортостандың атҡаҙанған артисы Рәмиҙә Мөхәмәтшина.

Ул ҡайтты... Ҡайтыр юлы һикәлтәле һәм тайғаҡ, ғүмере лә буталсыҡ һәм ҡатмарлы ине. Алыҫта, йылдар төпкөлөндә ҡалған, бала сағында ялан аяҡ йүгереп үткәргән ерҙәрҙе тағы бер тапҡыр күрергә, тип ҡайтты ул...
Ул ҡайтты. Тыуған тупрағын теҙләнеп үпте. Ҡайтыр улын көтөп, киткән юлына текләп күҙен талдырған, оло ҡайғыһынан, йәш көйө, иртә сәстәре салланған әсәһе алдында тубыҡланып, кисереү һораны. Һөйгәненең күҙҙәрендә мөхәббәт сатҡыларын эҙләне. Улының йөрәк тибешен тойҙо. Хыялы тормошҡа ашты... Ләкин уның ҡайтыуы әсәһен ғазаплы үлемгә дусар итте. Ә ҡатыны һәм улы өсөн уның ҡайтыуы, йөрәктәге уңалып барған яраларҙы кире ҡуҙғатты.